احوالات هنده
اختر سوم اسپهر ولایتدی حسین
افسر تارک اقلیم سعادتدی حسین
زیب خلقتدی حسین روح عبادتدی حسین
شمع پر شعلۀ پر جلوۀ بزم نبوی
پروردۀ زهرای عفیف و علوی
گل رعنای نبی قامت رعناسی گوزل
فعل و رفتاری گوزل سیرت و سیماسی گوزل
هدف و عشقی گوزل منطق شیواسی گوزل
خوان احسانی گوزل تربت معطوری گوزل
ائتدیگی نطقی گوزل ویردیگی دستوری گوزل
دل طوفاندا نجی اللهی حیرتده قویـان
یـادگار ابدی مکتب وحدتده قویـان
ماده تاریخی طلائی بشریتده قویـان
عالمون سلطنت و عزتنـه ناز ائلین
آلتی آیلیق بالاسین دیننـه سرباز ائلین
پیکر رحم و عطا هیکل خیر و برکات
مرتضا مَسلک،حسن سیرت و محمود صفات
آچان گوندن احبایـه اولان باب نجات
ابر تک بارش الطافی یـاغان هر طرفه
صله سین بذل ائلین عذریله سائل بکفه
نقل ائدور بو سوزی سلمان او سخنگوی امـین
روح با قدرت و ایمان شرف اهل یقین
مونس شیر خدا یـار رسول الثقلین
محرم بیت علی فاطمـه نون هم وردی
مکتب معرفتون شخص اول شاگردی
شـهر یثربده دیور کوچه ده هنگام گذر
یولدا بیر عابری گوردوم ائلدی جلب نظر
بیر قیزون دوتموش الیندن یولی آهسته گیدر
قیز مریضه ائده بیلمور قدمـین تز تز آتا
هر قدمده بالانین حالینـه ناظردی آتا
گوزی دوشدی منـه ناگه دئدی ای پاک روان
من یـهودم ئوزومـی یـاخشی تانورسان سلمان
بو مریضه قیزیمون دردینـه ائتسون درمان
یره توراتی قویوب تابع قرآن اولام
روشیمدن چکوب ال منده مسلمان اولام
دئدی سلمان گل اولوم من سَنیچون راهنما
بیر طبیبون آپاروم محضرینـه ایسته دوا
قزووی گورسون عنایت ائلسون فوری شفا
هر مریضه او طبیبون اولا لطف و نظری
عافیت رختی گیوب جسمـیده قالماز خطری
گتدی سلمان اولاری خانۀ زهرایـه دخیل
اذن آلوب محضر مولاده آچوب صحبته دل
ینـه قربان دئدی ای صاحب اوصاف جمـیل
بو قیزا واسطیم فوری مداوا ائده سن
تلخ بار عمرینی شیرین و گوارا ائده سن
دئدی سلمانـه او دلباختۀ ختم رسل
محرم مجلس توحید ولا هادی کل
خوش گلوبسوز ولی افسوس طبیب ایوده دگول
نگران اولما سنون ایستدیگون ایش دوزه لر
مختصر صبر ائله سلمان طبیب ایندی گلر
دئدی مولایـه بو سوز قویدی منی حیرتده
سنـه لقمان زمان قبطه ائدر حکمتده
جام عشقوندی قویوب خضرلری منتده
دم پاکوندی مسیحانی ائدن خلقه حبیب
واردی سندن صورا بو ایوده مگر آیری طبیب
ضمن صحبتده حسین قویدی او مأوایـه قدم
یوز دوتوبدی دئدی سلمانـه او مبنای کرم
او طبیبی کـه بابام اولدی معرف او منم
نور واحددی بو منزلده اولان خرد و کبار
ائله فکر ائتمـه اوشاقدور بو حسین دورد یـاشی وار
دستماز آلدی دوتوب قبلیـه یوز قیلدی نماز
سجده مسجودینـه ائتدی ایلدی راز و نیـاز
ساربان قطع ایلین اللری قالخزدی بیر آز
دیله گلدی دیدی ای مالک مـیعاد و جزا
بو ایوی ایله شفا خانـه شفا ویر بو قیزا
مستجاب ائتدی دعاسینی مجیب الدعوات
حقدن خلعت صحّت او قزا اولدی برات
مرض مـهلک الیندن قوتاروب تاپدی نجات
او قیزون بختینـه تقدیر ئوزی تقدیر ائلدی
آتاسی مسلم اولوب بیر اوجا تکبیر ائلدی
حقه اول تازه مسلمان ائلدی حمد و ثنا
گئتمگه رخصت آلوب ایستدی دورسون ایـاقا
قیز دئدی گیتمـیورم قوی منی بو ائوده آتا
گرک هر گون دولانام من بو طبیبون باشنا
شوقیله خدمت ائدم باجیسینا قارداشنا
منزله گیت آناما سویله قیزون اولدی عزیز
کرم ائتدی اونا دردانۀ سلطان حجیز
گلمدی قالدی اولا حضرت زهرایـه کنیز
امر مشگلدی یولوم خانـه مـیزه بیرده دوشـه
ایسته سه گوگلی منی بو ایوه گلسین گوروشـه
آتا گیتدی او بالا نایل اولوبدور هدفه
نچه ایل خدمت ائدوب عترت شاه نجفه
نیّت پاکی یتوردی اونی آخر شرفه
برج عصمتده مدار ائتدی گویون اولدوزی تک
فاطمـه تربیت ائتدی او قیزی اوز قیزی تک
گچدی ایل لر دولانوب سرعتیله چرخ زمان
دست تقدیر آیوروب وئردی اونا شامـی مکان
شـهره تین بسکه ایشیتمـیشدی یزید نادان
همسر ائتدی اوزونـه شآنی اوجالسون فلکه
زینبون خادمـه سی شامـیده اولدی ملکه
آرزومندیدی اقبالی دوباره اولا یـار
یول سالا مُلک حجازه دوتا یثربده قرار
ایلیـه منزل زهراده طبیبین دیدار
فاطمـه قزلارینون درک ائلیـه محضرینی
مقدم زینب عُلیـایـه آتا معجرینی
نصف شب بیر گیجه اول بانوی فرخنده لقا
صحنـه دوشمـیشدی ایشیتدی اوجالوب غملی صدا
قولاق آسدی گوره هاردان گلوری صوت نوا
گوردی کـه ناله ائدن منزل ویرانـه ده دور
ساره لی قوشدی کأنَّه دل کاشانـه ده دور
آغلیـان غملی بیر اورتدی یـانور غم کوزونـه
هوش و گوشیله قولاق وئردی اونون غم سوزونـه
یـاندیران سوزلر ایشیتدی دانشور ئوز ئوزونـه
نیلمـیشدوم منی ای چرخ ائلدون محنته توش
خانمانیم داغیلوبدور گزورم خانـه بـه دوش
مشتری اولدون همـیشـه بو آخان یـاشما
آناما رحم ائلدون نـه آتا نـه قارداشما
اللّی ایلدور قره معجر سالورام من باشما
بیر زمان واریدی جبریل بیزه خادمـیدی
دیللرون ازبری هر یرده منیم آدیمـیدی
هنده دیسگیندی تعجّبله دئدی یـا للعجب
بو نـه صحبتدی قولاقیم ایشیدور بو دل شب
کیمدی بو ناله ائدن کیمدی بو عالیـه نسب
گوشوار اولدی سوزی گوشیمـه گوشواره کیمـی
بدنیم اسدی دیزیم تتردی گهواره کیمـی
عجلیله گیجه نون وقتی او سیمای وقار
گوتوروبدی نچه فانوس نچه مشعلدار
دوره سین آلدی غلام و خدمـه دایره وار
قصردن چخدی جلال و حشم و عزتیله
یوز قویوب منزل ویرانیـه چوخ سرعتیله
ناگهان مسجد ویرانـه ایشیقلاندی گیجه
نور فانوس او یردن گوگه قوزاندی گیجه
اولین دفعه او منزلده چراغ یـاندی گیجه
مشعلون شعله سی پروانـه لره وئردی تکان
گوزونی آچدی یـاتان قیزلار اویـاندی یوخودان
زینبون دوره سینی آلدی یتیمـه بالالار
دئدیلر منزلیمـیز روشن اولوب عمّه ننـه وار
اسرایـه قیلوب اظهار او بانوی کبار
روزگارون هله وار کشمکشی زینبیله
دینمـیون هنده کنیزیمدی گلور موکبیله
خلق ائدن بیرده چتین منکیمـی غمکش یـارادا
سوزشی دائم اولا قلبیده گیزلین یـارادا
تز گلون حلقه ورون عموز اوتورسون آرادا
گیزلدون سوز مصیباتیله یـانمش بدنی
قویمـیون هنده گوره کهنـه لباسیله منی
هنده ویرانیـه القصه گلوب قویدی قدم
قویدولار صندل مخصوصینی اگلشدی او دم
گوردی بیر عده مصیبت زده دور مونس غم
تک بـه تک هر بیری رنجور اسارت گورونور
یوزلریندن ولی آثار نجابت گورونور
یوخدی طاقتلری محبسده یوروب زجر و فشار
بوریوب صورت زیبالرینی گرد و غبار
او قدر اوستی آچوق یرده یـاتوبدور بالالار
گیجه سرما توخانوب ایستی دگوب گوندوزلر
سهملی یللر اسوب لکّه سالوب گل یوزلر
غصه لی بیر اوجا بوی عورتی آلدی نظره
غملیدور غمزده نسوانی یغوب دور و بره
بالاجا قیزلاری عنقا تک آلوب زیر پره
آغاروب ساچلاری گرداب بلاده چالشور
باشینی سالموش اشاقه اورگیلن دانشور
بیر یتیمـه قیزا وئرمـیش دیزی اوستونده مکان
نـه یتیمـه گوزی شـهلا ایکی ابروسی کمان
لبی چون لعلیدی دیشلر صدفی غنچه دهان
فکر ائدوب هنده تعجّبله دئدی ئوز ئوزونـه
بو قیزون گوزلری اوخشور او طبیبون گوزونـه
یوز دوتوب حضرت زهرا قیزینا ائتدی خطاب
ائتموسن سن نیـه آق زلفووی رخساره نقاب
باشووی قوزا سن الله منـه وئر فوری جواب
شخص گمنامـیده اولسوز گنـه روشن دی سوزی
ائله تعریف نژاد و نسب و سلسله زی
دئدی زینب اونا بیز مفخر قوم عربوک
سرشناسوق ئوزومـیز قبلۀ اهل ادبوک
نسبت و سلسله مـیز پاکیدی هاشم نسبوک
یثربون نوش ائلیوب آب و غذاسین یمـیشوک
حق پرستوک ئوزومـیز حق دانشوب حق دیمـیشوک
هنده نون رنگی سولوب لرزیـه دوشدی بدنی
یثرب اهلی دئدی اولسوز ائله آگاه منی
تانیورسان حسنینون آناسی فاطمـه نی
من کنیزیدوم او بانوی نجیبیمدی منیم
گوزونون نوری حسین اوغلی طبیبیمدی منیم
یـاشورام شامـیده هجر عالمـی تاب و تبیله
خوش گونوم خانۀ زهراده کچوب منصبیله
خاطراتیم وار حسینون باجیسی زینبیله
اوندان اخذ ایلمـیشم طرز ادب ربط سخن
ایندیده خادمـه بیلم ئوزیمـی زینبه من
مُلک یثربده قاباق واریدی اجلالی اونون
تازه لیکده خبریم یوخ نجه دور حالی اونون
دیدی دیندیرمـه تنزّل ائدوب اقبالی اونون
گلشن عزتنـه باد مخالف اسیلوب
او طبیبیکه دیورسن باشی دالدانیلوب
دئدی هنده بو نـه صحبتدی دولور مغزیمـه شور
هاردادی زینب ئوزی فاش ائله قلبیم آلشور
دئدی ویرانـه ده دی منزلی سنلن دانشور
دیممـیشدوم سنـه هنده ائله حرمت قوناقا
نیـه بس دورمـیوسان صندلون اوستن ایـاقا
زینبم باخما تعجّبله بو آغلار گوزومـه
خم اولان قدیمـه آق زلفیمـه سولموش یوزومـه
اولما ویرانـه ده باور ایلمورسن سوزومـه
بالالار کـه گوروسن چرخ حیـا اولدوزودی
دیزیم اوسته اوتوران قیز او طبیبون قیزیدی
هنده بیر ضجّه چکوب بیر بیره ویردی الینی
زینبون فکر ائلدی آخرینی اولینی
یوزی اوسته یخلوب ترک ایلدی صندلینی
تاجینی ویردی یره باشینـه تُپراق سپدی
بالا قیزلارون ایـاقیندن الیندن اوپدی
مقدم زینبه دوشدی دئدی عفو ایله منی
گوزلریم کور اولا گوردوم نیـه بو حالدا سنی
یـاسلی اولدوم گییرم منده عزا پیرهنی
هنده نون جانی فدا گوزدن آخان یـاشووا
آغلارام هم سنـه بوندانصورا هم قارداشووا
اذن وئرسون منـه گرداب بلایـه باتارام
زندگی عشقینی بلمرّه باشیمدان آتارام
گیتمرم قصریمـه ویرانـه ده سیزلن یـاتارام
گون باتنجاق گونوز ایوای حسین وای دییرم
گیجه لر یـاتماسا هر قیز اونالای دییرم
دئدی گیت قصروه سن ائتمـه بو مأواده مقام
قوناقون واردی ایوینده اونا عرض ایله سلام
گور قزل طشتده نـه حاله قالوب رأس امام
ناله وی باخدوقیجا عرشـه یتورسون خوش اولار
خیزرانی ایویندن تز ایتورسون خوش اولار
قویمادی هنده ده زینب سوزی نـه صبر و نـه تاب
گوزلری اشک توکوب دامنینـه مثل سحاب
آغلیل آغلیـا یولداشلارینا قیلدی خطاب
خانمون امریدی ناچار خداحافظ ائدک
سوندورون مشعل و فانوسی قرانلوقدا گیدک
نـه روا حضرت زهرا قیزی ظلمتده قالا
خط سیریمده منیم مشعل اولا نور اوجالا
گوره سن قالدی الهی نیـه زینب بو حالا
بوکولوب قامتی خون دلینی اشگه قاتوب
یدّی قارداش باجیسی وای منـه گور هاردا یـاتوب
قصره یتسم ائدرم پرده لری فوری قرا
چیخادوب رخت حریری گیرم کهنـه قبا
قیلارام منزلیمـی بو گیجه دن بزم عزا
آچارام زلفیمـی آلوده اولار یـاشیما
قویـارام عطری کناره سپرم کول باشیما
نـه جفا فطرتیمـیش بو ایوی بر باد یزید
قویمارام بیر گیجه قصرینده اولا شاد یزید
خانمون زینبی گر ائتمسه آزاد یزید
قالمارام شامـیده حتما دوشرم چوللره من
دییرم دردیمـی چولدن کوچری ائللره من
« انورا » زحمتیله شعر ائلدون بو خبری
شاعرون رنجی چوخ اولسا اولی زیبا اثری
نغزگوسن وار حسینون سنـه لطف و نظری
باخما دیوانـه روشلر ائلسه طعن و عتاب
شکر ائله یتدی تمامـه هله دوردومجی کتاب
شاعر : ع پروفايل علامت تابی نهایت همراه متن عاشقانه مرحوم انور
. ع پروفايل علامت تابی نهایت همراه متن عاشقانه . ع پروفايل علامت تابی نهایت همراه متن عاشقانه ، ع پروفايل علامت تابی نهایت همراه متن عاشقانه[متن نوحه های ترکی و فارسی - احوالات شـهر شام ع پروفايل علامت تابی نهایت همراه متن عاشقانه]
نویسنده و منبع | تاریخ انتشار: Sat, 12 Jan 2019 07:54:00 +0000